“დრო ჩვენს წინააღმდეგ მუშაობს!” – რევმატოიდული ართრიტით დაავადებული პაციენტები შველას თბილისის მერიისგან ითხოვენ

რევმატოიდული ართრიტით დაავადებულ პაციენტთა კავშირი პეტიციას აქვეყნებს და დედაქალაქის მერიას შესაბამისი პროგრამის დაუყოვნებლივ ამოქმედებას სთხოვს. პაციენტები იმ ბიოლოგიურ პრეპარატებზე ხელმისაწვდომობას ითხოვენ, რომელმაც შესაძლოა დაავადებით გამოწვეული გაუსაძლისი ტკვილი, სახსრების შეუქცევადი დეფორმაცია ააცილოს და მათი ცხოვრების ხარისხი გააუმჯობესოს, წინააღმდეგ შემთხვევაში მათი სიცოცხლე და ჯანმრთელობა საფრთხის ქვეშ დგება.

თავად ბიოლოგიური პრეპარატი მკურნალობის უწყვეტობას მოითხოვს და სოლიდურ თანხებთანაა დაკავშირებული. გადარჩება ის, ვისაც ფული აქვს და პრეპარატს თავად იყიდის! – დღეს ასე დგას ამ პაციენტთა ჯანმრთელობის გადარჩენის საკითხი! მკურნალობის ხელმისაწვდომობის გაზრდის და მკურნალობის დროული დაფინანსების თხოვნით ყოველდღიურად ივსება პეტიცია და მოქალაქეები, პაციენტები, მათი ოჯახები ითხოვენ შველას. პეტიციაში ვკითხულობთ:

„რევმატოიდული ართრიტი აუტოიმუნური, ქრონიკული დაავადებაა, რომლისთვისაც დამახასიათებელია სახსრების პროგრესირებადი, შეუქცევადი დაზიანება და  ქმედუუნარობის განვითარება. ყოველი მეასე ადამიანი დაავადებულია რევმატოიდული ართრიტით, ქალები 3-ჯერ ხშირად ავადდებიან, ვიდრე მამაკაცები და დაავადება უპირატესად ვითარდება 35-60 წლის ასაკის ინდივიდებში.  გლობალური სტატისტიკის მიხედვით  რევმატოიდული ართრიტით დაავადებულ პაციენტთა 2/3 აღენიშნება მსუბუქი ან საშუალო სიმძიმის ქმედუუნარობა, ხოლო 10%-ს – მძიმე ქმედუუნარობა. განვითარებად ქვეყნებში პაციენტთა ნახევარი დიაგნოზის დასმიდან 10 წლის განმავლობაში კარგავს სამსახურს და შესაბამისად საარსებო წყაროს. რევმატოიდული ართრიტით დაავადებული პაციენტების სიცოცხლის ხანგრძლივობა შესაძლებელია შემცირდეს 5-10 წლით.  რევმატოიდული ართრიტის სამკურნალო საშუალებები შეიძლება ორ ჯგუფად დაიყოს. პირველი ჯგუფი, რომელსაც მიეკუთვნება არასტეროიდული ანთების საწინააღმდეგო პრეპარატები და გლუკოკორტიკოსტეროიდები, იძლევა მხოლოდ სიმპტომურ შვებას, მაშინ, როცა მეორე ჯგუფის პრეპარატები (დაავადების მამოდიფიცირებელი ანტი-რევმატიული მედიკამენტები და ბიოლოგიური პრეპარატები) განაპირობებენ  რევმატოიდული ართრიტის პროგრესირების შეფერხება/შეჩერებას და სახსრების ფუნქციის შენარჩუნებას.“

აქვე, ვიგებთ რომ პროგრამა საქართველოში, აჭარის ავტონომიურ რესპუბლიკაში მცხოვრები პაციენტებისთვის 2020 წლიდან მოქმედებს და იქ მცხოვრებ მოქალაქეებს უფინანსდებათ მკურნალობა, სხვა პაციენტები უთანასწორო მდომარეობაში არიან, მათ რეალურად შესაძლოა,  დაკარგონ ქმედუნარიანობა მხოლოდ იმის გამო, რომ სრულფასოვნად ვერ იტარებენ საჭირო მკურნალობას ფინანსების არარსებობის გამო.

დეტალებში გასარკვევად მივმართეთ, როგორც თბილისის მერიის შესაბამის სამსახურს, ასევე შესაბამისი პროფილის ექიმსა და პაციენტს რომელიც რეალურად უკვე იღებს პრეპარატს, რომელმაც როგორც თავად პაციენტი გვიზიარებს, ის იხსნა რეალური კრახისგან.

ნინო ჯეირანაშვილი ექიმი რევმატოლოგი ღიად საუბრობს იმ პრობლემებზე, რაც პაციენტებს აწუხებთ და აჟღერებენ პრაქტიკულად არაერთი წელია მთავრობის, სახელმწიფო სტრუქტურების და შეკრებების სხვადასხვა დონეზე. მისი თქმით “დაავადება გამოირჩევა კომპლექსურობით და პროგრესირებადი ხასიათით, უპირველეს ყოვლისა აუცილებელია დაავადების შესახებ ცნობადობის ამაღლება, რათა პაციენტებმა დროულად მიმართონ ექიმს და  დაიწყონ სწორი მკურნალობა, ასევე ნიშანდობლივია, რომ მისი მართვა ფინანსურად დიდ დანახარჯებთან არის დაკავშირებული. ექიმების და პაციენტების მხრიდან არის  თხოვნაც და ფაქტობრივად მოთხოვნაც, რომ დაუფინანსდეთ საერთაშორისო რეკომენდაციებთ გათვალისწინებული მკურნალობა. რევმატოიდულ ართრიტს  ახასიათებს მუდმივი, შემაწუხებელი მტანჯველი ტკივილი, რაც საერთო ჯამში აქვეითებს ადამიანის ცხოვრების ხარისხს და ემოციურ მდგრადობას. სამწუხაროდ  დღეისათვის მისი გამომწვევი, ტრიგერი არ არის ცნობილი, მაგრამ არსებობს მთელი რიგი რისკის ფაქტორები რომელიც ზუსტად ვიცით. მსოფლიოს 1 პროცენტს ანუ 700 მილიონ ადამიანს აქვს ეს დაავადება. ერთ–ერთი საკვანძო საკითხი მისი დროული დიაგნოსტიკაა, რადგან დიაგნოსტიკა ხდება გვიან სტადიაზე, მაშინ როდესაც შუქცევადი დეფორმაცია უკვე დაწყებულია. ყურადსაღებია, რომ დაავადება უფრო მეტად გავრცელებულია ქალებში.“

ცნობილი მსახიობი მარინა საღარაძე ამჯერად, პაციენტის რანგში გაგვესაუბრა, მისი თქმით: „როდესაც აღმომაჩნდა ეს დაავადება, მივხვდი, რომ ასე ყოფნა არ შეიძლება, შევძელი ექიმის მიერ დანიშნული ბიოლოგიური პრეპარატით მკურნალობა, რამაც ფაქტობრივად ფეხზე დამაყენა, დღეს არ მგონია რომ მე ვარ ავად, გამოვიყურები და გადავაადგილდები, როგორც ჩვეულებრივი რიგითი, პრაქტიკულად ჯანმრთელი ადამიანი. ეს ძალიან ხარჯიანი და ტკივილებით სავსე დაავადებაა, აქვეითებს ცხოვრების ხარისხს, 10 წელია რაც ვებრძვი ამ დაავადებას. წამალი გადავისხი რეგულარულ რიტმში, უწყვეტობას დიდი მნიშვნელობა აქვს. ჩვენ შევქმენით „რევმატოიდული ართრიტით დაავადებულ პაციენტთა კავშირი“ რომლის თავმჯდომარეც არის ინგა მამუჩიშვილი, გვქონდა უამრავი აქტივობა, აქცია, უკვე მეორე პეტიცია დავწერეთ და იმედი გვაქვს რომ დაჩქარდება ეს პროცესი, შეიქმნება პროგრამა და დაფინანსდება თბილისის მერიის მიერ. ძვრა დაიწყო მერიაში, დაანონსდა, რომ ერთ–ერთი დაავადება რომლის მკურნალობაც დაფინანსდება, იქნება რევმატოიდული ართრიტი, მთავარია რომ ეს მოხდეს უფრო ადრე.“

თბილისის მერიას მივმართეთ თუ არა იმ დღესვე მივიღეთ პასუხი. პასუხი იყო ვრცელი და მოგვითხრობდა იმ ყველა პროგრამის შესახებ რომელიც მიმდინარე წელს დაფინანსდა და მართლაც ბევრი ადამიანი იხსნა შესაძლო ჯანმრთელობის გაუარესებისგან. იმედიც მოგვეცა, რადგან წერილში აღწერილი შინაარსი გვპირდება საარჩევნო ვადაში პროგრამის ამოქმედებას. უცვლელად გთავაზობთ წერილის შინაარსს: “თბილისის მერის კახა კალაძის 2021 წლის წინასაარჩევნო პროგრამიდან, მერიის ჯანდაცვისა და სოციალური მომსახურების საქალაქო სამსახურმა, მიმდინარე წელს, ჯანდაცვის მიმართულებით უკვე დაიწყო „სოციალურად დაუცველი საპენსიო ასაკის პირებისთვის მედიკამენტების დაფინანსების“ ე.წ. 500 ლარიანი ვაუჩერის პროგრამა, „დაავადებათა სკრინინგის“ პროგრამას დაემატა ორგანიზებული სკრინინგის კომპონენტი და „გაფანტული სკლეროზის სამკურნალო მედიკამენტების“ პროგრამას დაემატა მაღალტექნოლოგიური კვლევების დაფინანსების კომპონენტი. რაც შეეხება „რევმატოიდული ართრიტის სამკურნალო ბიოლოგიური პრეპარატებით მკურნალობის დაფინანსების პროგრამას“, რომელიც, ასევე, გათვალისწინებულია, მისი და სხვა დანარჩენი პროგრამების განხორციელება დაგეგმილია საარჩევნო პროგრამით განსაზღვრულ ვადაში“, – თბილისის მერიის ჯანდაცვისა და სოციალური მომსახურების საქალაქო სამსახურის ჯანდაცვის განყოფილების უფროსი ნათია ვერძაძე.

შარშან რევმატოიდული ართრიტით დაავადებულმა პციენტებმა მინის კოლბაში ჩასმული ხელის სკულპტურები ყველა სახელმწიფო ორგანიზაციას დაუგზავნეს, იმის ნიშნად, რომ ისინი დახმარებას ითხოვენ, მათ შველა სჭირდებათ, დრო მათ წინააღმდეგ მუშაობს! –  წლის რომელ თვეს, დღესა და რიცხვს უნდა ელოდნონ? როდის დადგება ის მომენტი როდესაც სახელმწიფო მოიცლის მათი გაუსაძლისი ტკივილებისთვის ჯერ არავინ იცის. პროგრამის დროულად არამოქმედების შემთხვევაში, ჩვენს მოქალაქეებს, აჭარის მოსახლეობის გამოკლებით, ჩვენი დაუდევრობით და დროული ჩაურევლობით, გულგრილობით გაუსაძლისი ტკივილების, სახსრების შეუქცევადი დეფორმაციისა და საბოლოოდ უნარშეზღდუდულობისთვის ვიმეტებთ და ამაში დამნაშავენი ვიქნებით ჩვენ! საზოგადოება!

მოაწერეთ ხელი პეტიციას, სანამ გვიან არ არის!

გადადით ბმულზე https://manifest.ge/item/3728/signiture მოაწერეთ ხელი პეტიციას, გაავრცელეთ თქვენს სოციალურ ქსელებში და ასე გამოხატეთ მხარდაჭერა რევმატოიდული ართრიტის მქონე პაციენტების მიმართ.

ყველაფერი ჩვენს ხელშია!