მთავარი » ჯანდაცვა » სამედიცინო სიახლეები » ჯანდაცვის მინისტრი და მისი მოადგილე ჟენევაში, ჯანმრთელობის მსოფლიო ასამბლეის 76-ე სესიაში იღებენ მონაწილეობას

ჯანდაცვის მინისტრი და მისი მოადგილე ჟენევაში, ჯანმრთელობის მსოფლიო ასამბლეის 76-ე სესიაში იღებენ მონაწილეობას

„საქართველო გადადგამს ყველა საჭირო ნაბიჯს, რათა დააჩქაროს პროგრესი სტრატეგიული მიზნების მიღწევისკენ და გაიზარდოს თითოეული ქალის, ბავშვისა და მოზარდის ჯანმრთელობა”, – აღნიშნულის შესახებ თამარ გაბუნიამ, ჟენევაში, ჯანმრთელობის მსოფლიო ასამბლეის კომიტეტზე სიტყვით გამოსვლისას განაცხადა.

ჯანდაცვის მინისტრის პირველმა მოადგილემ დელეგატებს ქალთა, ბავშვთა და მოზარდთა ჯანმრთელობის ხელშეწყობის გლობალური სტრატეგიის იმპლემენტაციის შედეგები გააცნო. თამარ გაბუნიამ აღნიშნა, რომ საქართველოს მთავრობა აგრძელებს ძალისხმევას დედათა, ახალშობილთა და ბავშვთა ჯანმრთელობის სერვისების, მათ შორის ანტენატალური, პერინატალური და მშობიარობის შემდგომი მზრუნველობის
გაძლიერებისკენ.

„ანტენატალური სერვისების პაკეტი, რომელსაც საყოველთაო ჯანდაცვის პროგრამა ფარავს, მუდმივად ფართოვდება არსებული მტკიცებულებებისა და საუკეთესო პრაქტიკის გათვალისწინებით. დაინერგა მომსახურების მიწოდების ახალი მეთოდები, მათ შორის ტელემედიცინა, რათა უზრუნველყოფილ იქნას რეგულარული ანტენატალური მეთვალყურეობა, ასევე მუდმივი კომუნიკაცია ოჯახებსა და ჯანდაცვის პროვაიდერებს შორის“, – განაცხადა თამარ გაბუნიამ.

ჯანდაცვის მინისტრი ზურაბ აზარაშვილი და მინისტრის მოადგილე თამარ გაბუნია შვეიცარიაში ოფიციალური ვიზიტით იმყოფებიან, სადაც ჯანმრთელობის მსოფლიო ასამბლეის რიგით 76-ე სესიაში იღებენ მონაწილეობას.

ვიზიტის ფარგლებში, საქართველოს ჯანდაცვის მინისტრი ჯანმრთელობის მსოფლიო ორგანიზაციის ევროპის რეგიონულ დირექტორს შეხვდა. მინისტრმა, ჰანს კლუგეს „ჯანმო“-ს მხრიდან საქართველოსთვის გაწეული დახმარებისთვის მადლობა გადაუხადა.

ზურაბ აზარაშვილმა ფარმაცევტული რეფორმის მნიშვნელობაზე, ასევე DRG დაფინანსების მოდელზე გაამახვილა ყურადღება და აღნიშნა, რომ რეფორმები, სწორედ ჯანმრთელობის მსოფლიო ორგანიზაციასთან აქტიური თანამშრომლობით განხორციელდა.

შეხვედრაზე მხარეები საქართველოს ჯანდაცვის სისტემის გაძლიერების კუთხით კიდევ უფრო მჭიდრო თანამშრომლობაზე შეთანხმდნენ. ზურაბ აზარაშვილმა ხაზი გაუსვა, რომ ჯანმრთელობის მსოფლიო ორგანიზაცია საქართველოს მნიშვნელოვანი პარტნიორია.

 

იხილეთ ასევე

ერთ წელიწადში ამბულატორიული სერვისები 11 პროცენტით, საავადმყოფოების მომსახურება კი 7.6 პროცენტით გაძვირდა

მიმდინარე წლის მარტთან შედარებით, აპრილში ჯანმრთელობის დაცვის ჯგუფში ფასები 0.9 პროცენტით გაიზარდა. მონაცემებს საქსტატი ავრცელებს. …