ღამის კლუბების გახსნა გაურკვეველი ვადით გადაიდო

როგორც ღიბრაძემ განაცხადა, იმ ქვეყნებშიც კი, სადაც კლუბები ფუნქციონირებდა, „ომიკრონის“ გამოჩენის შემდეგ, იკეტებიან.

„საქართველოში უკვე დაფიქსირდა „ომიკრონი“ და მიმდინარეობს კიდევ კვლევა რამდენიმე შემთხვევაზე და პოტენციალი, რომ ამ ვირუსის გავრცელება მოხდეს, ცხადია, მაღალია. შესაბამისად, კლუბებთან მიმართებაში ლიბერალიზაცია არ არის. არ მიგვიღია გადაწყვეტილება კლუბების გახსნასთან დაკავშირებით, რადგან ტენდენცია რომ ვნახოთ მთელ მსოფლიოში, სადაც დასაშვები იყო კლუბების მუშაობა, შეზღუდვები ამოქმედდა. რაც შეეხება შრომის ინსპექციას, არასწორია, რომ მათ არ მოუხდენიათ შესაბამისი რეაგირება დარღვევებზე“, – განაცხადა ღიბრაძემ.

შეგახსენებთ, რომ ღამის კლუბების გახსნა 17 დეკემბრიდან იგეგმებოდა, თუმცა გასულ კვირაში საკოორდინაციო საბჭოს სხდომა არ გამართულა. ამის შემდეგ შეიქმნა მოლოდინი, რომ ეს დაწესებულებები, ორწლიანი პაუზის შემდეგ, მუშაობის განახლების უფლებას მიმდინარე კვირიდან მიიღებდნენ.