„სულ რომ გაჩერდეს ტაქსი, ეს მაინც გასაკეთებელია,“ – ტაქსის კომპანია „მწვანე პასპორტის“ ამოქმედებაზე

ტაქსის კომპანია 200-200-ის ხელმძღვანელი ნიკა ხოფერია “ბიზნესპარტნიორთან“ აცხადებს, რომ მთავრობამ „მწვანე ბარათების“ ამოქმედების გადაწყვეტილება აუცილებლად უნდა მიიღოს, თუმცა, მისთვის უცნობი და ბუნდოვანია, როგორი იქნება კონტროლის მექანიზმები.

„მწვანე ბარათის ამოქმედებას რა თქმა უნდა ვეთანხმებით, დაცული იქნება მძღოლი, მომხმარებელი და ეს სიტუაციის გაჯანსაღებას შეუწყობს ხელს.

როდესაც მანქანა გამოძახებაზე მიდის, მომხმარებელი ამბობს, რომ აქვს მწვანე ბარათი და ამ დროს, აღმოჩნდება, რომ ტყუის, ასეთ დროს რა ხდება? შესაბამისად, თავად მთავრობამ უნდა მოიფიქროს, როგორ მოხდება ამის გაკონტროლება.

რაც შეეხება ხარჯებს, ისედაც დაზარალებულ  სექტორს, რომელიც ძლივს სუნთქავს, ინვესტირების საშუალება არ აქვს. ამიტომ, ამ კუთხით ფინანსები მთავრობამ უნდა გამოყოს. ეს საქმე აუცილებლად გასაკეთებელია, სულ რომ გაჩერდეს ტაქსი და მხოლოდ სასურსათო მაღაზიები დარჩეს, მაინც გასაკეთებელია, ხალხი უნდა გადარჩეს, აქ სიკვდილ-სიცოცხლეზეა საუბარი და ეს ბევრს გაცნობიერებული არ აქვს,“ – აცხადებს ხოფერია.

შეგახსენებთ, ბოლო დღეებია ქვეყანაში ეპიდემიოლოგიური მდგომარეობა უარესდება. დაავადებათა კონტროლის ეროვნული ცენტრის ინფორმაციით, ბოლო დღე-ღამეში ინფექციას 62 ადამიანი ემსხვერპლა.

მთავრობა აცხადებს, რომ იგეგმება “მწვანე ბარათების” ამუშავება, თუმცა ვადები და კონკრეტული პირობები ისევ არ სახელდება.