სკოლების ნაწილი ონლაინ-სწავლებაზე სრულად გადავიდა – არღვევენ თუ არა ამ გადაწყვეტილებით დირექტორები მოქმედ რეკომენდაციებს?

რაც შეეხება სკოლებს, უახლესიო სტატისტიკა შაბათს დილით გავრცელდა: განათლების სამინისტროს ინფორმაციით, ბოლო კვირის მონაცემებით, კორონავირუსი მასწავლებელთა 0,8%-ს, ხოლო მოსწავლეების 0,1%-ს დაუდასტურდა.

დისტანციურ სწავლებაზე იმყოფება სრულად 21 სკოლა და 84 ცალკეული კლასი.

ამასთან, კვირას საღამოს სოციალურ ქსელებში, სხვადასხვა სკოლის დირექტორებმა გაავრცელეს ინფორმაცია 31 იანვრამდე სასწავლო დაწესებულების სრულად ონლაინ-რეჟიმზე გადასხვლის შესახებ. არგუმენტად სკოლაში ინფიცირების მაღალი მაჩვენებელი დასახელდა.

დირექტორების აღნიშნულ გადაწყვეტილებებს მშობელთა ნაწილის პროტესტი მოჰყვა – მათთვის გაუგებარია, რატომ გადაიყვანეს მათი შვილების კლასები დისტანციურ სწავლებაზე მაშინ, როცა უშუალოდ კლასში კოვიდინფექცია არ არის დადასტურებული. განათლების სამინისტროში განმარტავენ, რომ არსებული წესის მიხედვით, ინფიცირების შემთხვევაში ონლაინ-სწავლებაზე მხოლოდ უშუალოდ ის კლასი უნდა გადავიდეს, სადაც კოვიდინფექცია დადასტურდება. თუმცა, სიტუაციის ანალიზის საფუძველზე, ეპიდემიოლოგის რეკომენდაციით, სკოლა შესაძლოა მთლიანად დისტანციურ რეჟიმზე გადავიდეს ცალკეულ კლასებში ინფიცირების ფაქტების არარსებობის მიუხედავად.

შეგახსენებთ, რომ სააღმზრდელო და სასწავლო პროცესი, საახალწლო არდადეგების შემდეგ 17 იანვრიდან განახლდა.