მცხეთის სამედიცინო ცენტრი ჩვეულ გრაფიკს დაუბრუნდა და პოსტკოვიდური განყოფილება გახსნა

პანდემიის მწვავე ფაზის გადავლის შემდეგ კოვიდკლინიკების ნაწილი აქცენტს პოსკტოვიდურ გართულებებზე აკეთებს.

მცხეთის სამედიცინო ცენტრში, რომელიც ორ წელზე მეტი ხნის განმავლობაში ერთერთი მსხვილი კოვიდმიმღები კლინიკა იყო, პოსტ-კოვიდური განყოფილება გაიხსნა, რომელსაც პაციენტებს შეუძლიათ კოვიდ ვირუსით გამოწვეული გართულებების სამკურნალოდ მიმართონ.

„კოვიდ-19-თან ასოცირებული სიმპტომები შესაძლოა მიმდინარეობდეს რამდენიმე თვე.

ყველაზე მეტად გავრცელებული პოსტ-კოვიდური სიმპტომებია: დაღლილობის შეგრძნება, ქოშინი და სუნთქვის გაძნელება, ხველა, სახსრების ტკივილი, გულმკერდის ტკივილი, მეხსიერების, კონცენტრირების ან ძილის პრობლემები, კუნთების ტკივილი ან თავის ტკივილი,  ტაქიკარდია / ბრადიკარდიის ეპიზოდები, ყნოსვისა და გემოვნების დაკარგვა (ზოგჯერ რამდენიმე თვეც კი),  დეპრესია და შფოთვითი აშლილობა,

დაბალი (სუბფებრილური) ტემპერატურა, თავბრუსხვევა დგომისას, გამონაყარი, თმის ცვენა, მენსტრუალური ციკლის ცვლილება. COVID-19 ძირითადად გავლენას ახდენს ფილტვებზე, თუმცა ასევე შეუძლია დააზიანოს მრავალი სხვა ორგანო, მათ შორის გული, თირკმელები და ტვინი. ორგანოთა დაზიანებამ შეიძლება გამოიწვიოს ჯანმრთელობის გართულებები, რომლებიც გრძელდება COVID-19 დაავადების შემდეგ, სუნთქვის ხანგრძლივი პრობლემები, გულის გართულებები,  თირკმლის ქრონიკული უკმარისობა, ინსულტი და გილენ-ბარეს სინდრომი (იწვევს დროებით დამბლას).

რაც უფრო მძიმედ მიმდინარეობდა დაავადება, მით უფრო გრძელვადიანი და მრავალსიმპტომიანია პოსტ-კოვიდური გართულებები.პოსტ-კოვიდური კარდიული გამოვლინება შესაძლო იყოს: მიოკარდიტი, არითმია, იშემია,“ – აცხადებენ კლინიკაში.

ამ ეტაპზე კლინიკა ჩვეული გრაფიკით მუშაობს და პაციენტებს გეგმიურ სერვისებსაც სთავაზობს. ამასთან, სამედიცინო დაწესებულებაში კოვიდგანყოფილება შენარჩუნებულია.