გერმანელი მეცნიერების მტკიცებით, კორონავირუსი ხელოვნურადაა შექმნილი

სამი მეცნიერისგან შემდგარი ჯგუფი ირწმუნება, რომ აღმოაჩინა მტკიცებულება კორონავირუსის ლაბორატორიული წარმოშობის შესახებ, იტყობინება გერმანული ტელეარხის n-tv–ის ვებგვერდი.

კვლევის თანახმად, ეს 99,9%-ით არის ბუნებრივი ვირუსის ადამიანის მიერ შექმნილი ასლი.

მანამდე, ბრიტანულ სამედიცინო ჟურნალ Lancet-ში კორონავირუსის შესახებ კომისიამ გამოაქვეყნა ანგარიში ორწლიანი მუშაობის საფუძველზე, რომელშიც ნათქვამია, რომ არ გამორიცხავდა COVID-19-ის ლაბორატორიულ წარმოშობას. კვლევის გამოქვეყნებასთან დაკავშირებით ჯანდაცვის მსოფლიო ორგანიზაციამ განაცხადა, რომ აგრძელებს SARS-CoV-2 ვირუსის წარმოშობის წყაროს ძიებას.

„სხვა მოლეკულურ მტკიცებულებებთან ერთად, ჩვენი შედეგები აჩვენებს, რომ ეს ვირუსი 99.9%-ით ხელოვნურია, ალბათ ბუნებრივი ვირუსის მანიპულირებული ასლი“, – განუცხადა ტელევიზიას ვალენტინ ბრუტელმა, კვლევის ერთ-ერთმა ავტორმა, რომელმაც იმუნოლოგიის დოქტორის ხარისხი 2022 წელს მიიღო.

სამი მეცნიერის ჯგუფი ირწმუნება, რომ აღმოაჩინა ვირუსის ლაბორატორიული წარმოშობის მტკიცებულება. მათ წინასწარი დასკვნები ისე გამოაქვეყნეს, რომ ჯერ განხილვის პროცესი არ გაუვლია. ისინი ამტკიცებენ, რომ Sars-CoV-2 არის განზრახ გენეტიკურად მოდიფიცირებული ვირუსი.

როგორც მეცნიერმა განმარტა, მეთოდები, რომლებიც სავარაუდოდ გამოიყენებოდა Sars-CoV-2-ის შესაქმნელად, ასევე ანალოგიურად გამოიყენება ცალკეული ვირუსოლოგიური ლაბორატორიების მიერ სინთეზური ვირუსების წარმოებისთვის. ბრუტელი ამბობს, რომ ის ასევე იყენებს ამ მეთოდებს ყოველდღიურ საქმიანობაში, მაგრამ ცილებზე დაფუძნებული სრულიად უვნებელი წამლების შესაქმნელად ავტოიმუნური დაავადებების სამკურნალოდ.

მეცნიერთა აზრით, მათ Sars-CoV-2 გენომში ერთგვარი „თითის ანაბეჭდი“ აღმოაჩინეს. ეს არის რეგულარულად განმეორებადი ნიმუში ვირუსის გენომში, განმარტა ბრუტელმა. ლაბორატორიები, რომლებიც გენეტიკურად მოდიფიცირებენ რნმ ვირუსებს, როგორიცაა Sars-CoV-2, პირველად აგროვებენ გენეტიკურ მასალას ცალკეული დნმ-ის სამშენებლო ბლოკებიდან, თქვა მან. დამახასიათებელი ნიმუშები რჩება ამ სამშენებლო ბლოკების შეერთების მახლობლად.

ბრუტელმა და მისმა კოლეგებმა შეადარეს ცნობილი ხელოვნური ვირუსების და ბუნებრივი ვირუსების გენომები. როგორც მეცნიერმა განმარტა, ბუნებრივ ვირუსებში ამოცნობის ადგილები სრულიად შემთხვევით ნაწილდება, ხელოვნურად შექმნილში კი ყოველთვის გარკვეული ნიმუშით ჩნდებიან. „ეს ნიმუში ასევე გვხვდება Sars-CoV-2-ში, მაგრამ არა მჭიდროდ დაკავშირებულ ვირუსებში“, განმარტა მეცნიერმა. მან თქვა, რომ წინასწარი შედეგების მიხედვით, ალბათობა იმისა, რომ ბუნებრივმა ევოლუციამ შემთხვევით შექმნა ეს ნიმუში, არის არაუმეტეს ერთი 100-დან და შესაძლოა ბევრად ნაკლები.

commersant.ge