დიაბეტის მქონე ბავშვებისთვის სენსორული აპარატების მიმწოდებელი კომპანია გამოვლინდა

გამოვლინდა გამარჯვებული კომპანია, რომლისგანაც ჯანდაცვის სამინისტრო CGM სისტემებს შეისყიდის. ამის შესახებ ინფორმაციას ჯანდაცვის სამინისტრო ავრცელებს.

უწყების ინფორმაციით, შაქრიანი დიაბეტის ტიპი I დიაგნოზის მქონე ბავშვებისთვის სისხლში გლუკოზის უწყვეტი მონიტორინგის სისტემებისა და სენსორებით (CGM) მომარაგების პროცესი აქტიურ ფაზაშია. გამარჯვებული კომპანია უკვე გამოვლინდა, რომლისგანაც ჯანდაცვის სამინისტრო CGM სისტემებს შეისყიდის. პროექტის ფარგლებში, აღნიშნული სისტემით, საქართველოში აღრიცხული, ტიპი I  დიაბეტით დაავადებული ყველა ბავშვი იქნება უზრუნველყოფილი.

ჯანდაცვის მინისტრის პირველი მოადგილის თქმით,  სიახლე, ბავშვს და მშობელს მისცემს შესაძლებლობას, რომ უსაფრთხოდ და დისკომფორტის გარეშე მოახდინონ გლუკოზის მონიტორინგი.

“ძალიან მნიშვნელოვანია, ბავშვს რომელსაც აქვს პირველი ტიპის შაქრიანი დიაბეტი ჰქონდეს სისხლში გლუკოზის უწყვეტი მონიტორინგის შესაძლებლობა. უკვე პრაქტიკულად იმ ეტაპზე მივედით, რომ შეგვიძლია ძალიან მალე მომარაგებაზე დავიწყოთ საუბარი. აღნიშნულ პროცესში, ძალიან აქტიური იყო ბატონი მინისტრის პირადი მონაწილეობა.

სიახლე იძლევა საშუალებას, რომ ბავშვისთვის უსაფრთხოდ და დისკომფორტის გარეშე მოხდეს გლუკოზის მონიტორინგი. თუ რაიმე ცვლილება აღმოცენდა სისტემა იძლევა განგაშის სიგნალს, რაც ასევე სწრაფი რეაგირების საფუძველია, რითაც სიცოცხლისთვის საშიში მდგომარეობის თავიდან აცილებაა შესაძლებელი. ჩვენი მიზანი, ამ პროექტის დაწყებისთანავე იყო ის, რომ ყველა ბავშვს საქართველოში, რომელსაც აქვს პირველი ტიპის შაქრიანი დიაბეტი, ჰქონდეს ყველა აქტივობაში ჩართვის შესაძლებლობა. სწორედ ამისთვისაა საჭირო უწყვეტი მონიტორინგის სისტემები. ცხადია, ყველა ბავშვის საჭიროება სრულად იქნება დაკმაყოფილებული“, – განაცხადა თამარ გაბუნიამ.

მისივე თქმით, გამარჯვებულის გამოვლენის ფორმალური პროცედურები ძალიან მალე დასრულდება,  რის შემდეგაც მოწოდებისა და დანერგვის ვადები გახდება ცნობილი.

„მომწოდებელი კომპანიის დასახელება, ამ ეტაპზე, სამართლებრივი პრინციპებიდან გამომდინარე არ შემიძლია. თუმცა მთავარი, ამ შემთხვევაში, ჩვენთვის არის ხარისხობრივი მახასიათებლები, რომ  გვქონდეს ხარისხის გარანტია და ავტორიზებული იყოს ყველა ელემენტი, მათ შორის აპლიკაცია, რომელიც გამოიყენება სისტემის მუშაობის დროს.  არაავტორიზებული მოწოდება, ამ ტიპის მოწყობილობაზე, ძალიან სარისკოა ბავშვის ჯანმრთელობისთვის. ასე რომ, ეს არის ყოველმხრივ ხარისხიანი მოწყობილობა, რომელიც ბავშვების საჭიროებას სრულად დააკმაყოფილებს“, – აღნიშნა თამარ გაბუნიამ.

მინისტრის პირველმა მოადგილემ აღნიშნა, რომ დიაბეტის მართვის პროგრამაში ასევე შევიდა სხვა მნიშვნელოვანი ცვლილებები: ინსულინის ანალოგებზე გადასვლა და დოზის კორექცია, სპეციალური კომისიის გარეშე, ექიმ-სპეციალისტის მიერ გაცემული ცნობის საფუძველზე მოხდება, რაც პაციენტებისთვის და მათი მშობლებისთვის პროცედურებს საგრძნობლად გაამარტივებს.  ასევე, გაიზარდა ნემსების რაოდენობაც. წლის განმავლობაში, პროგრამაში ჩართულ ბავშვზე 300 ინსულინის ნემსი გაიცემოდა, ცვლილების მიხედვით კი 400 ნემსის გაცემა მოხდება. ასევე, დაემატა მცირე ზომის, 4 მილიმეტრიანი ნემსის არჩევის შესაძლებლობა. დაზუსტდა გლუკაგონის გაცემის პირობებიც.

შაქრიანი დიაბეტი ტიპი I-ით დაავადებულ ბავშვების მშობლები სენსორული აპარატების მიღებას თვეებია, ითხოვენ. ამ მოთხოვნით მათ ჯანდაცვის სამინისტროსან რამდენჯერმე აქციაც კი გამართეს.

შეგახსენებთ, რომ თანამედროვე, სენსორულმა აპარატებმა  გლუკომეტრები უნდა ჩაანაცვლოს, რომლითაც სისხლში შაქრის დონის განსაზღვრა დღეში რამდენჯერმე, ჩხვლეტის გზით ხდება. ახალი მოწყობილობა კი 24-საათიანი მონიტორინგის ფუნქციას მარტივად, ფიზიკური და ფსიქოლოგიური ტრავმის გარეშე ასრულებს.

jandacva.ge