„მიზანია ბაზისური საჭიროებების დაკმაყოფილება“ – რატომ შეიზღუდა „საყოველთაო ჯანდაცვაში“ დამატებითი სერვისების მიღება

„დიარჯის“ ამოქმედების შემდეგ პაციენტს თანაგადახდის დადგენილი წილის გარდა არანაირი თანხის, მათ შორის არც კვების საფასურის გადახდა არ მოუწევს. ამის შესახებ ჯანდაცვის მინისტრის მოადგილემ თამარ გაბუნიამ განაცხადა.

მან კიდევ ერთხელ გააკეთა განმარტება იმასთან დაკავშირებითაც, რომ კლინიკებს აღარ აქვთ უფლება, პაციენტს დამატებითი თანხები მოთხოვონ. გაბუნიამ განმარტა, რომ თუ პაციენტს დამატებითი მომსახურების მიღება სურს, შეუძლია კერძო სადაზღვევო სქემებით ისარგებლოს ან სამედიცინო სერვისის მთელი ღირებულება თავად დაფაროს.

„ახალი მეთოდის დანერგვის მთავარი პრინციპი არის ის, რომ პაციენტი თავისუფალი იყოს დამატებითი გადასახადისგან გარდა იმ თანაგადახდისა, რომელიც ეკუთვნის საყოველთაო პროგრამის ფარგლებში, რაც რიგ შემთხვევაში არაფერი არ არის, საპენსიო ასაკისთვის შეიძლება იყოს 10%, ხოლო 30% – თუ პაციენტს აქვს შედარებით მაღალი შემოსავალი და სოციალური სტატუსი. სხვა ნებისმიერი დამატებითი გადასახადი, იქნება ეს კვება თუ რაიმე სხვა, მაგალითად „ვიაიპი“ პალატა და ა.შ., არ უნდა გადაიხადოს პაციენტმა. კვება დაფარულია იმ ანაზღაურების ფარგლებში, რასაც კლინიკა დიარჯით მიიღებს,“ – განაცხადა  გაბუნიამ.

მისი თქმით, დამატებითი მომსახურებების, მაგალითად „ვიაიპი“ პალატის გადახდის საშუალება პაციენტს აქვს კერძო დაზღვევის საშუალებით ან საკუთარი ჯიბიდან გადახდის პირობით.

მინისტრის მოადგილემ განმარტა, რომ სახელმწიფო პროგრამის ფარგლებში დამატებითი და განსაკუთრებული სერვისები არ ანაზღაურდება და პროგრამა მიმართულია იქითკენ, რომ უზრუნველყოს ბაზისური საჭიროებების თანაბრად დაკმაყოფილება.

ამასთან, თამარ გაბუნიას თქმით, მთავარი ხარისხის მექანიზმია, ამიტომ ხდება დაკვირვება ბაზისურ ინდიკატორებზე – მათ შორის იმაზე, როგორ შეიცვალა პაციენტის კლინიკაში დაყოვნების დრო. მისივე განმარტებით, სახელმწიფოს აქვს ინტერესი, რომ იმაზე ნაკლები დროის განმავლობაში არ დაყოვნდეს პაციენტი კლინიკაში, ვიდრე მას სჭირდება. ამასთან, თუ კლინიკა პაციენტს ვადაზე ადრე გამოწერს, მაღალია ალბათობა, რომ მას რეჰოსპიტალიზაცია დასჭირდება, რაც სამედიცინო დაწესებულებას არ აუნაზღაურდება.

თამარ გაბუნიას განცხადებით, დიარჯი „სვამს“ ერთ ტარიფს, ხოლო რომელ ექიმს, კვალიფიკაციის მიხედვით, რა მოცულობის ჰონორარს გადაუხდის, ეს სამედიცინო დაწესებულების მენეჯმენტის გადასაწყვეტია.

საყოველთაო ჯანდაცვის პროგრამის მონაწილე კლინიკები ანაზღაურების ახალ, DRG-სისტემაზე 1 ნოემბრიდან გადავიდნენ. DRG-მოდელი საყოველთაო ჯანდაცვის პროგრამის ფარგლებში დაფინანსების მოცულობას პაციენტის დიაგნოზისა და სხვა რამდენიმე ფაქტორზე დაფუძნებით განსაზღვრავს. ასეთი შეიძლება იყოს ასაკი, სქესი, გეოგრაფიული ლოკაცია და სხვა.

მთავარი პოზიტიური შედეგი, რომელსაც დაფინანსების ეს სისტემა გულისხმობს, პაციენტის მიერ დამატებითი თანხის გადახდის პრაქტიკის აღმოფხვრაა.