ამ ეტაპზე საქართველოში „დელტამიკრონის“ არცერთი შემთხვევა არ დაფიქსირებულა

გასულ დღე-ღამეში საქართველოში კორონავირუსის 368 შემთხვევა დადასტურდა. დადებითობის მაჩვენებელი ასეთია: დღიური – 6,25%, ბოლო 14 დღის – 8,23%, ბოლო 7 დღის – 5,42%.

გარდაიცვალა 8 ადამიანი. ერთ დღეში მხოლოდ 130 ადამიანი აიცრა. სტაციონარში 813 ადამიანი იმყოფება.

დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, ქვეყანაში ეპიდსიტუაცია სტაბილურდება, მათ შორის მცირდება სიკვდილიანობის მაჩვენებელი. თუმცა გამყრელიძე იმ საფრთხეებზეც საუბრობს, რომლებიც აცრის დაბალ მაჩვენებელს უკავშირდება.

„სამწუხაროდ, მოგეხსენებათ, რომ ძალიან დაბალია აცრის მაჩვენებელი. თუ ჩვენ იანვარში გვქონდა ყოველდღიური 7 000, თებერვალში 3 000, მარტში გვაქვს 1000. ეს ძალიან ცუდია, რადგან იმუნური ფენა ჯერჯერობით საქართველოში აცრის შემდგომ დაბალია. აცრილია მხოლოდ მოზრდილი მოსახლეობის 43.6%, ბუსტერი აქვს გაკეთებული 8%-ს. ამიტომ, ძალიან სიფრთხილე გვმართებს, რადგან მოგეხსენებათ მთელ რიგ ქვეყნებში იგივე „ომიკრონის“ მეორე ტალღა აღინიშნება: ავსტრიაში, დანიაში, ბრიტანეთში. საკმაოდ რთული მდგომარეობაა ჰონკონგში. ასევე ჩინეთის ქალაქებში იმატებს რაოდენობა. იქ, სადაც აცრის მოცვის მაჩვენებელი დაბალია, შესაძლებელია, კვლავ იყოს გარკვეული მატების ტენდეცია. მთავარი მოწოდება ისევ და ისევ, იმუნური ფენის გაძლიერებაა. განსაკუთრებით, მნიშვნელოვანია ბუსტერი, რადგან ბუსტერი იცავს რეალურად, როგორც ინფიცირების, ასევე დამძიმებისგან და სიკვდილიანობისგან“, – განაცხადა გამყრელიძემ.

რაც შეეხება „დელტამიკრონს“, გამყრელიძის თქმით, წინასწარი მონაცემებით, აღნიშნულ შტამს „დელტას“ მსგავსი გართულებები არ ახასიათებს.

„დელტამიკრონი“ ეს ჰიბრიდია „დელტასი“ და „ომიკრონის“. ჯერჯერობით მხოლოდ ერთეული შემთხვევებია სეკვენირებით დადგენილი სხვადასხვა ქვეყნებში. წინასწარი ინფორმაციით, მას „დელტას“ სიმძიმე არ ახასიათებს და ჭარბობს „ომიკრონის“ თვისებები, რომელიც უფრო მსუბუქი მიმდინარეობით ხასიათდება. ჩვენ თვალყურს ვადევნებთ. ჩვენი ცენტრი აკეთებს შტამების მონიტორინგს, გვაქვს რამდენიმე ბაზა, საიდანაც ვაკვირდებით და ვაკეთებთ სეკვენირებას. ჯერჯერობით, ჩვენთან არ დაფიქსირებულა არც ერთი შემთხვევა თუმცა, ალბათობა ყველა ქვეყანაში არის, რომ ახალი შტამი გაჩნდეს“, – განაცხადა გამყრელიძემ.