Jandacva.ge
სასტუმრო “თბილისი მარიოტში” დღეს, ევროკავშირის აღმოსავლეთ პარტნიორობის არაფორმალური დიალოგის მე-6 შეხვედრა გაიმართება ჯანდაცვის მინისტრების დონეზე.
შეხვედრაში მონაწილეობას მიიღებენ ვროპული სამეზობლო პოლიტიკისა და ევროკავშირის გაფართოების მოლაპარაკებების ევროკომისარი – იოჰანეს ჰანი, ჯანდაცვისა და სურსათის უვნებლობის საკითხებზე ევროკომისარი – ვიტენის ანდრიუკაიტისი, ევროკავშირის წარმომადგენლები და აღმოსავლეთ პარტნიორობის ქვეყნები ჯანდაცვის სამინისტროების (საქართველო, უკრაინა, ბელარუსი, მოლდოვა, სომხეთი, აზერბაიჯანი) მაღალი დონის დელეგაციები.
ჯანდაცვის სამინისტროს ინფორმაციით, შეხვედრაზე განიხილება ჯანდაცვის უსაფრთხოებასთან (Health Security) დაკავშირებული შემდეგი საკითხები: 1. ჯანდაცვის მსოფლიო ორგანიზაციის ჯანმრთელობის საერთაშორისო რეგულაციები (IHR); 2. ანტიმიკრობულ რეზისტენტობასთან (AMR) ბრძოლა; 3. იმუნიზაციის გაძლიერება.
სამუშაო სადილზე კი თამბაქოს ჩარჩო კონვენციის იმპლემენტაციისა და თამბაქოს პროდუქტების უკანონო ვაჭრობის აკრძალვის დამატებით ოქმთან დაკავშირებულ საკითხებს განიხილავენ. სპეციალურად ამ ღონისძიებისთვის საქართველოში ჩამოდის ჯანდაცვის მსოფლიო ორგანიზაციის თამბაქოს ჩარჩო კონვენციის სამდივნოს ხელმძღვანელი – ვერა ლუიზა და კოსტა ე სილვა. ღონისძიების ბოლოს დაგეგმილია პრესკონფერენცია.
ასევე, დაგეგმილია შრომის, ჯანმრთელობისა და სოციალური დაცვის მინისტრისა და სოფლის მეურნეობის მინისტრის ორმხრივი შეხვედრები.
ევროკავშირის ინიციატივით, მინისტრთა შეხვედრები 2013 წლიდან ტარდება პარტნიორ ქვეყნებში და ითვალისწინებს ზოგად (საგარეო საქმეთა მინისტრები) და სექტორულ (დარგობრივი მინისტრები) შეხვედრებს და მასში მონაწილეობას ევროკავშირის მაღალი თანამდებობის პირები, ევროპული სამეზობლო პოლიტიკისა და გაფართოების მოლაპარაკებათა და ასევე – შესაბამისი დარგის ევროკომისრები ღებულობენ.
