ამერიკაში ახალშობილებს განვითარების შეფერხებაზე ტესტირებას ჩაუტარებენ

ამერიკის შეერთებული შტატების წამლებისა და პროდუქტების სამმართველომ (FDA) ამერიკულ ბაზარზე პირველად დაუშვა პოსტნატალური ტესტი, რომელიც ახალშობილის სისხლის ანალიზით იძლევა იმის დადგენის საშუალებას, აქვს თუ არა ბავშვს გენეტიკური მიდრეკილება განვითარების შეფერხებისა და გონებრივი ჩამორჩენისადმი. ინფორმაციას თავად უწყება ავრცელებს.

აშშ-ის ჯანმრთელობის ეროვნული ინსტიტუტისა და პედიატრიის ამერიკული აკადემიის მონაცემებით, ამერიკელი ბავშვების 2-3 პროცენტს აღენიშნება ინტელექტუალური განვითარებისა და ჩამორჩენის სხვადასხვა ფორმა.

დარღვევების დიდ ნაწილს საფუძვლად უდევს ქრომოსომული ანომალიები.

ტესტი CytoScan Dx Assay, რომელიც კალიფორნიულმა კომპანია Affymetrix-მა შექმნა, საშუალებას იძლევა, სისხლის წვეთით ჩატარებულ იქნას სრული გენომური ანალიზი და აღმოაჩინოს სხვადასხვა ტიპის ქრომოსომული დარღვევები.

ტესტი არაა განკუთვნილი პრენატალური სკრინინგის ან სხვა გენეტიკული მიზეზებით გამოწვეული დაავადების ან მიდრეკილების გამოვლენისთვის.

CytoScan Dx Assay-ს ტესტებმა აჩვენა მისი უპირატესობა ქრომოსომული ანომალიების გამოვლენის სხვა მეთოდებთან შედარებით.

FDA-ს წარმომადგენლის ალბერტო გუტიერესის განცხადებით, კლინიკურ პრაქტიკაში ახალი მეთოდის დანერგვა ხელს შეუწყობს განვითარების შეფერხების შესაძლო მიზეზების ადრეულ აღმოჩენას, რაც მედიკოსებსა და მშობლებს შესაძლებლობას მისცემს,  ადრეულ ეტაპზევე უზრუნველყონ  ბავშვები აუცილებელი დახმარებით.

ამერიკის შეერთებულ შტატებში ბოლო ნახევარი საუკუნის განმავლობაში ხორციელდება ყველა ახალშობილის სკრინინგის პროგრამა გენეტიკურ დაავადებებზე. ამ ეტაპზე სკრინინგი 29 ასეთ დაავადებას მოიცავს. ჯერჯერობით უცნობია, ჩაერთვება თუ არა სკრინინგის ეროვნულ პროგრამაში ტესტირება CytoScan Dx Assay-ს საშუალებით.