ინფექციური კლინიკის ახალ შენობაში გადასვლის ვადები ისევ შეიცვალა – მინისტრის განცხადებით, რეაბილიტაცია წლის ბოლომდე დასრულდება

ახალი ინფექციური საავადმყოფოს სარეაბილიტაციო სამუშაოები წლის ბოლომდე  დასრულდება. ამის შესახებ ჯანდაცვის მინისტრმა ზურაბ აზარაშვილმა პარლამენტში, „მინისტრის საათის“ ფორმატში გამოსვლისას განაცხადა.

„სამედიცინო დაწესებულება უახლესი სამედიცინო ტექნოლოგიებით აღიჭურვება და ის ინფექციური საავადმყოფოს სტანდარტებს სულად დააკმაყოფილებს. ამ სივრცეში განთავსდება თანამედროვე სტანდარტების,

მაღალტექნოლოგიური, როგორც მოზრდილთა, ისე ბავშვთა ინფექციური ცენტრი და მისი გუნდი. მოეწყობა უმაღლესი სტანდარტების მქონე ლაბორატორია, მიმღები და სტაციონარული განყოფილებები“,-განაცხადა ზურაბ აზარაშვილმა.

მანამდე არსებული ინფორმაციით, ინფექციურ საავადმყოფოს ახალ შენობაში ფუნქციონირება შემოდგომიდან უნდა დაეწყო.

შეგახსენებთ, რომ ტერიტორია, რომელზეც თბილისის ინფექციური კლინიკა ფუნქციონირებს, 2009 წლიდან „ავერსი ფარმას“ საკუთრებაა და ამ წლების განმავლობაში კომპანია ამ ტერიტორიის დაცლას ითხოვდა. რაც შეეხება ახალ შენობას, მასში გადასვლა ჯერ 2023 წლის გაზაფხულისთვის დაანონსდა, მიმდინარე წლის აპრილის დასაწყისში კი კლინიკის ხელმძღვანელმა თენგიზ ცერცვაძემ განაცხადა, რომ ახალ შენობაში გადასვლის ვადად შემოდგომა განისაზღვრა.