Jandacva.ge
ჯანმრთელობის მსოფლიო ორგანიზაცია კოვიდ-19-ის მსუბუქი და საშუალო სიმძიმის პაციენტებისთვის, რომლებსაც ჰოსპიტალიზაციის მაღალი რისკი აქვთ, Paxlovid-ის გამოყენების მკაფიო რეკომენდაციით გამოდის. მისი განმარტებით, ეს დღეისათვის საუკეთესო თერაპიული არჩევანია რისკჯგუფებში შემავალი ადამიანებისთვის. ამავდროულად, ჯანმო აცხადებს, რომ მწარმოებელთან დადებულ ორმხრივ ხელშეკრულებებში არ არსებობს გამჭვირვალობა ფასთან მიმართებაში, ასევე პრობლემად სახელდება მასზე ხელმისაწვდომობა და სწრაფი ტესტირების შესაძლებლობა მედიკამენტის მიღებამდე. ეს ყველაფერი კი, ჯანმოს განმარტებით, სიცოცხლის გადამრჩენელ ამ წამალს სერიოზულ სირთულედ აქცევს დაბალი და საშუალო შემოსავლების მქონე ქვეყნებისთვის.
Pfizer-ის წარმოებული პერორალური ვირუსსაწინააღმდეგო პრეპარატი განკუთვნილია კოვიდ 19-ით ინფიცირებული იმ პაციენტებისთვის, რომელთა დაავადება მძიმედ არ მიმდინარეობს და ამასთანავე მძიმე გართულებები გამოწვევის მაღალი რისკის წინაშე დგანან. ასეთ ადამიანებს შორის არიან არავაქცინირებული, ხანში შესული ან დასუსტებული იმუნიტეტის მქონე პაციენტები.
კვლევის შედეგები აჩვენებს, რომმკურნალობის შემდეგ ჰოსპიტალიზაციის რისკი 85%-ით მცირდება.
დაბალი და საშუალო შემოსავლების მქონე ქვეყნებისთვის ამ პრეპარატით სარგებლობისთვის ერთერთი ხელისშემშლელი ფაქტორია ის, რომ მისი მიღება დაავადების ადრეულ სტადიაზეა საჭირო, ამიტომ აუცილებელია სწრაფი და ზუსტი ტესტირება. თუმცა შედარებით ღარიბ ქვეყნებში ჩატარებული ტესტირება თითქმის 80-ჯერ ჩამორჩება განვითარებული ქვეყნების მაჩვენებელს.
ჯანმო უკიდურესადაა შეშფოთებული იმით, რომ, ისევე როგორც კოვიდ-ვაქცინაციის შემთხვევაში, დაბალი და საშუალო შემოსავლების მქონე ქვეყნები „პაქსლოვიდის“ რიგში ბოლო ადგილებზე იქნებიან.
პრობლემაა მწარმოებელი კომპანიის მხრიდან გამჭვირვალობაც, რის გამოც ჯანმო ვერ იღებს ზუსტ ინფორმაციას მედიკამენტების მარაგების და იმის შესახებ, რომელი ქვეყნები იღებენ მონაწილეობას ორმხრივ გარიგებებში და რა თანხას იხდიან ისინი.
ამასთან, „პაქსლოვიდის“ ჯენერიკი გარანტირებული ხარისხის წყაროებიდან ჯერჯერობით ხელმიუწვდომელია. ჯენერიკების რამდენიმე მწარმოებელი განიხილავს ჯანმოს წინასწარი კვალიფიკაციის მიღებას ამ პრეპარატის წარმოების მიზნით, თუმცა მათ ამითვის შესაძლოა, გარკვეული დრო დასჭირდეთ, რათა საერთაშორისო სტანდარტები დააკმაყოფილონ.
ამიტომ ჯანმო მოუდოდებს Pfizer-ს, საკუთარი პროდუქტის ფასები და გარიგებები უფრო გამჭვირვალე გახადოს, ასევე გააფართოვოს ლიცენზიის მოქმედების გეოგრაფია, რათა ჯენერიკების მეტმა მწარმოებელმა შეძლოს წამლის წარმოების დაწყება და ბაზარზე ეს პრეპარატი ხელმისაწვდომ ფასად გამოჩნდეს.
შეგახსენებთ, რომ საქართველოს აღნიშნული პრეპარატი უკვე აქვს, თუმცა „ფაიზერთან“ დადებული ხელშეკრულების დეტალები არ საჯაროვდება. ჯანდაცვის სამინისტროს ინფორმაციით, მედიკამენტის მიღება რამდენიმე პაციენტმა უკვე დაიწყო და მან პრაქტიკაში მაღალი ეფექტი აჩვენა.
