Jandacva.ge
საკანონმდებლო ცვლილების გატარების შემდეგ, აგვისტოს დასაწყისიდან დღემდე უკანონო ფარმაცევტული საქმიანობის 2 შემთხვევა გამოვლინდა, მედიკამენტების უკანონოდ გაცემის კი 16 ფაქტი.
როგორც ჯანდაცვის სამინისტროს რეგულირების სააგენტოს ფარმაცევტული საქმიანობის ინსპექტირების სამმართველოს უფროსმა ნანა შაშიაშვილმა „ბიზნესკონტაქტს“ განუცხადა, აღნიშნულ პერიოდში ლეგალური ბრუნვის წესების დარღვევის 26 ფაქტია გამოვლენილი, 2 შემთხვევაზე მუშაობა კი დღესაც მიმდინარეობს.
მისი თქმით, წესების დარღვევის შემთხვევები ფიქსირდება როგორც თბილისში, ასევე რეგიონებშიც. 2 აფთიქის შემთხვევაში კი ადგილი ჰქონდა ფსიქოტროპული მედიკამენტების ნებართვის გარეშე რეალიზებას.
წლის დასაწყისიდან დღემდე კი ფარმაცევტულ ბაზარზე ადმინისტრაციული სამართალდარღვევის 409 ფაქტია გამოვლენილი, მათ შორის 93 შემთხვევაში საუბარია პირველი ჯგუფის ფარმაცევტული პროდუქტის ბრუნვის წესების დარღვევაზე. 14 აფთიაქს ნებართვა გაუუქმდა, 2 დაწესებულების მიმართ კი საქმის წარმოება მიმდინარეობს.
“საქართველოს მთავრობის დადგენილებაში 4 აგვისტოს შევიდა ცვლილება, რომელიც რეგულაციების გარკვეულწილად გამკაცრებას გულისხმობს. ეს ეხება ავტორიზებულ აფთიქებს, რომლებიც გასცემენ პირველი ჯგუფის ფარმაცევტულ პროდუქტს.
ცვლილებით, ავტორიზებული აფთიაქის ნებართვა აღარ გაიცემა ფიზიკურ და იურიდიულ პირებზე, რომლებიც არიან ნასამართლები და რომლებსაც აქვთ დაკისრებული სახდელი უნებართვოდ საქმიანობასთან დაკავშირებით, ან ურეცეპტოდ წამლის გაცემაზე და აქედან არაა გასული 3 წელი. ცვლილება შეეხო პროფესიული პასუხისმგებლობის საკითხსაც.
კერძოდ, თუ მოხდება პირველი ჯგუფის ფარმაცევტული პროდუქტის გაცემა ურეცეპტოდ, ფარმაცევტი ხვდება რეესტრში და შედეგად ეკრძალება 3 წლის ვადით პირველი ჯგუფის მედიკამენტის რეალიზაცია და 1 წლის ვადით მესამე ჯგუფის ფარმაცევტული პროდუქციის რეალიზება. რეგულირების სააგენტო ყოველდღიულ რეჟიმში მუშაობს და ის არ შემოისაზღვრება მხოლოდ ავტორიზებული დაწესებულებებით.
აფთიაქების გარკვეულმა ნაწილმა უკვე განაცხადი შემოიტანა აფთიაქის ნებართვის გაუქმებაზე, რამდენიმე აფთიაქი დაიხურა და შეწყვიტა ფუნქციონირება. ეს პროცესი გაგრძელდება და საბოლოოდ ბაზარზე დარჩებამხოლოდ ის დაწესებულებები რომლებიც კანონის ჩარჩოში მოახდენენ პირველი ჯგუფის ფარმაცევტული პროდუქტის რეალიზებას”, – ამბობს ნანა შაშიაშვილი.
