Jandacva.ge
ქვეყანას წამლის ხარისხის კონტროლის პირველი ეროვნული ლაბორატორია აქვს. ასეთი ლაბორატორიის შექმნაზე წლებია, საუბრები მიმდინარეობს.
თავად ხელისუფლებამ წლების წინ აღიარა ლაბორატორიის შექმნის აუცილებლობა, თუმცა დღემდე ამ საკითხის მოგვარება ვერ მოხერხდა. ამიტომ, წლების განმავლობაში წამლების შემოწმება ხდებოდა კერძო ლაბორატორიებში, სამხარაულის ბიუროში ან უცხოეთში, რაც დროსთან და დამატებით ფინანსებთან იყო დაკავშირებული და ამასთან, ასეთი პრაქტიკა ხარისხის სრულყოფილი კონტროლის საშუალებას არ იძლეოდა. ამიტომ, ექსპერტები მუდმივად საუბრობდნენ იმაზე, რომ ქვეყანაში ფარმაცევტული პროდუქციის კონტროლი არ ხდება.
ახალი ლაბორატორია თბილისში, ასათიანის ქუჩაზე გაიხსნა. მისი ხელმძღვანელის ნინო ვახანიას თქმით, დაწესებულება აღჭურვილია ულტრათანამედროვე ტექნოლოგიებით და მასში მედიკამენტები სამი მიმართულებით მოწმდება.
„პირველი ესაა ფიზიკურ-ქიმიური მიმართულება, ლაბორატორიას გააჩნია ულტრათანამედროვე აპარატურა მაღალი ხარისხის სიზუსტით, რომელიც ამოწმებს მედიკამენტის იდენტობას, მინარევებს, შეუძლია სხვადასხვა პარამეტრის გაზომვა – სიბლანტე, სიმკვრივე, ცვეთადობა, დაშლადობა და ა.შ. ასევე არის მიკრობიოლოგიური ლაბორატორია, რომელიც სისუფთავისა და სტერილობის შემოწმებას ახდენს. ფუნქციონირებს მოლეკულურ-ბიოლოგიური ლაბორატორიაც, რომელიც დეენემის დონეზე, პისიარ და სექვენირების მეთოდებით ახდენს დაბინძურებული მედიკამენტის სიზუსტის დადგენას,“ – განაცხადა ვახანიამ.
შეგახსენებთ, რომ ლაბორატორიის პროექტში სახელმწიფომ 11 მილიონი ლარის ინვესტიცია ჩადო.
