რეგულირების სააგენტო აფთიაქებს მოუწოდებს, გიოქსიზონის მალამოს კონკრეტული პარტიის რეალიზაცია შეაჩერონ

სამედიცინო და ფარმაცევტული საქმიანობის რეგულირების სააგენტო მიმართავს ფარმაცევტული პროდუქტის ყველა რეალიზატორს, დაუყოვნებლივ შეწყვიტონ გიოქსიზონის მალამოს კონკრეტული პარტიის რეალიზაცია და უზრუნველყონ მათი გამოთხოვა ფარმაცევტული ბაზრიდან.

სააგენტოს ვებგვერდზე განთავსებული ინფორმაციის თანახმად,  ლევან სამხარაულის სახელობის სასამართლო ექსპერტიზის ეროვნული ბიუროს მიერ წარმოდგენილი ქიმიური ექსპერტიზის დასკვნის თანახმად, ფარმაცევტული პროდუქტი – „გიოქსიზონი, (1გ + 3გ)/100გ 10 გ გარეგანი და ადგილობრივი გამოყენების მალამო ალუმინის ტუბი №1, სერია – 150521, ვარგისობის ვადა – 05.2024, მწარმოებელი – შპს „ოფიცინა, საქართველო“ არ აკმაყოფილებს, რეგისტრაციის პროცესში წარმოდგენილი ფარმაკოპეის სტატიის მოთხოვნებს აღწერილობასა და ტუბის შიგთავსის საშუალო მასაზე. სააგენტო მიმართავს ფარმაცევტული პროდუქტის ყველა რეალიზატორს, დაუყოვნებლივ შეწყვიტონ ფარმაცევტული პროდუქტის რეალიზაცია და უზრუნველყონ მათი გამოთხოვა ფარმაცევტული ბაზრიდან.

აღნიშნული მალამო გამოიყენება უფროსებსა და 8 წელზე უფროსი ასაკის ბავშვებში შემდეგი ჩვენებების დროს: ფოლიკულიტები, ფურუნკულოზი, ინფიცირებული ეგზემები და ჭრილობები, ეროზიები, ახალშობილის ჭინჭრის ციება; მსუბუქი და ალერგიული დერმატიტი, სებორეა; მზის ერითემა, მწერების ნაკბენები; დამწვრობები, მოყინვები და სხვა.