Jandacva.ge
საქართველოში მოქმედი 50-მდე ფარმაცევტული საწარმოდან წლის ბოლომდე „ჯი ემ პი“ სტანდარტის დაკმაყოფილებას მხოლოდ 3-4 კომპანია შეძლებს, დანარჩენებს გაჩერება მოუწევთ. ამის შესახებ საქართველოს ფარმაცევტთა ასოციაციის ხელმძღვანელმა ლევან გოგიბერიძემ jandacva.ge-ს განუცხადა.
მისი თქმით, ფარმაცევტული კომპანიები ჯანდაცვის სამინისტროს სთხოვენ, ახალი სტანდარტების დაკმაყოფილების ვადები გაუხანგრძლივონ. კერძოდ, ეს ვადები ინდივიდუალური მიდგომით, კონკრეტული ბიზნესსუბიექტის მიერ წარმოდგენილი გეგმის მიხედვით განისაზღვროს. გოგიბერიძის განმარტებით, აღნიშნულ გეგმაში დეტალურად უნდა იყოს გაწერილი დაფინანსების მოძიების და ინფრასტრუქტურული საკითხები, ასევე ტრენინგების და სხვა თემები. კითხვაზე, მაქსიმუმ, რამდენი ხნით ითხოვენ კომპანიები ვალდებულების გადავადებას, გოგიბერიძე ამბობს, რომ ზოგიერთი საწარმოსთვის ეს შესაძლოა 2 წელი იყოს, სხვისთვის – 1 წელი. ვადები ინდივიდუალურად, წარმოდგენილი გეგმების საფუძველზე უნდა დადგინდეს.
ლევან გოგიბერიძე „ჯიემპი“ სტანდარტის ამოქმედების დაგვიანების პასუხისმგებლობას სამთავრობო სტრუქტურებს აკისრებს, რომლებმაც, მისი თქმით, არ გადადგეს ნაბიჯები ამ მიმართულებით, რასაც ვერ ვიტყვით ბიზნეს სექტორზე, რომელსაც, გოგიბერიძის განცხადებით, დაწყებული აქვს მუშაობა ახალი მშენებლობების მიმართულებით, ძველი წარმოების შემთხვევაში კი – წარმოების ახალ სტანდარტზე გადაწყობის მიმართულებით.
ლევან გოგიბერიძე „ჯიემპი“ სტანდარტის დაკმაყოფილების ვალდებულების ვადების გადაწევის საჭიროებას ასე ხსნის: „პანდემიამ მსოფლიო 2 წლის განმავლობაში გააჩერა, ამან შეზღუდა მწარმოებლები განვითარების მიმართულებით, რადგან ინფრასტრუქტურული პროექტები „დადებული“, გამზადებული სახით არ არსებობს – ისევე როგორც სავენტილაციო სისტემები და სხვა დანადგარები. ისინი უნდა შეუკვეთო და მოარგო შენ წარმოებას. თუმცა, თუ ადრე ამნას სჭირდებოდა 1 წელი, პანდემიის გამო ეს ვადები გაიზარდა და სირთულეები შეიქმნა. ამას დაუმატეთ საბრძოლო მოქმედებები, რამაც ასევე იქონია გავლენა პროცესის გაჭიანურებაზე. გასათვალისწინებელია ისიც, რომ „ჯიემპი“ და „ჯიდიპი“ მიმართულების სპეციალისტები თითზე ჩამოსათვლელი გვყავს. უცხოეთიდან მათი მოწვევა კი ზემოთ დასახელებული ფაქტორების გამო გართულებულია. თუმცა არავინ უარყოფს, რომ ეს სტანდარტები ქვეყანაში დასანერგია.“
გოგიბერიძის განცხადებით, მხოლოდ ის, რომ ჩვენი მწარმოებლები გადავლენ „ჯიემპი“ სტანდარტებზე, არ ნიშნავს, რომ მათ გაეხსნებათ საერთაშორისო ბაზრები, ამისთვის აუცილებელია ეროვნული მარეგულირებელი ორგანოს ინტეგრირება შესაბამის ევროპულ სტრუქტურებში.
ფარმაცევტული საწარმოებისთვის ჯიემპი სტანდარტის დაკმაყოფილება სავალდებულო 2022 წლის 1 იანვრიდან გახდა. თუმცა პროცესი ეტაპობრივია და GMP-ის სტანდარტზე გადასვლა იმის მიხედვით მოხდება, თუ რომელ თვეში აქვს აღებული ბიზნესსუბიექტს საქმიანობის ნებართვა.
კერძოდ, 2022 წლის 1 იანვრამდე გაცემული ფარმაცევტული წარმოების ნებართვის მქონე იურიდიულ პირებს, რომელთა მიმართაც ნებართვა გაიცა იანვარში, თებერვალში, მარტში, აპრილში ან მაისში (ნებართვის გაცემის წლის მიუხედავად), GMP-ის სტანდარტთან შესაბამისობის სერტიფიკატის გარეშე საქართველოს ბაზრისთვის განკუთვნილი ფარმაცევტული პროდუქტის წარმოება ეზღუდებათ 2022 წლის 30 ივნისიდან, ხოლო დანარჩენ თვეებში გაცემული ნებართვების შეზღუდვის ვადად განისაზღვრება იმ თვის ბოლო რიცხვი, რომელ თვეშიც განხორციელდა ნებართვის გაცემა.
იმ შემთხვევაში, თუ ადგილობრივად წარმოებული ფარმაცევტული პროდუქტი განკუთვნილია მხოლოდ ექსპორტისთვის, ასეთი ტიპის ფარმაცევტული წარმოება 2025 წლის 1 იანვრამდე თავისუფალია საქართველოს ნაციონალური GMP-ის სტანდარტის ფლობის ვალდებულებისგან.
ჯანდაცვის სამინისტროში ფარმაცევტული კომპანიებისთვის ჯიემპი სტანდარტის ვადების კიდევ უფრო გადაწევის შესაძლებლობაზე არ საუბრობენ. უწყებაში აცხადებენ, რომ აღნიშნული ცვლილების მთავარი მიზანი წამლების ხარისხის უზრუნველყოფაა.
jandacva.ge
