დიაბეტის მქონე ბავშვებს სენსორები ამ დრომდე არ მიუღიათ – ჯანდაცვის სამინისტროსთან ხვალ აქცია გაიმართება

დიაბეტის მქონე ბავშვების მშობლები ჯანდაცვის სამინისტროსთან აქციის გამართვას გეგმავენ. აქცია ხვალ, 13 საათზე დაიწყება.

პროტესტის მიზანი ისაა, რომ, დაპირების მიუხედავად, ბავშვებს დღემდე არ მიუღიათ სპეციალური სენსორული აპარატები, რომლებიც სისხლში გლუკოზის უწყვეტი მონიტორინგის საშუალებას იძლევა. მშობლები აცხადებენ, რომ გასულ წელს ჯანდაცვის სამინისტროსგან მიიღეს დაპირება, რომ აპარატებს 2022 წლის იანვრიდან მიიღებდნენ, თუმცა ამ მოწყობილობებს დღემდე უშედეგოდ ელოდებიან.

მათივე თქმით,  უწყებასთან კომუნიკაცია გართულებულია და იციან მხოლოდ ის, რომ აპარატების შეძენაზე ტენდერი ჯერ არ გამოცხადებულა. ამიტომ მშობლები შიშობენ, რომ აპარატებს კიდევ 3-4 თვის განმავლობაში ვერ მიიღებენ, რაც ბავშვებისთვის სერიოზულ პრობლემებს შექმნის.

ჯანდაცვის მინისტრის მოადგილემ აღნიშნულთან დაკავშირებით რამდენიმე დღის წინ განაცხადა, რომ ბავშვები ამ აპარატს შესყიდვის პროცედურების შემდეგ მიიღებენ, თუმცა  თამარ გაბუნიამ კონკრეტული ვადები ვერ დაასახელა.

თანამედროვე, სენსორულმა აპარატებმა  გლუკომეტრები უნდა ჩაანაცვლოს, რომლითაც სისხლში შაქრის დონის განსაზღვრა დღეში რამდენჯერმე, ჩხვლეტის გზით ხდება. ახალი მოწყობილობა 24-საათიანი მონიტორინგის ფუნქციას მარტივად, ფიზიკური და ფსიქოლოგიური ტრავმის გარეშე ასრულებს.

18 წლამდე ტიპი 1 დიაბეტით დავადებულ პაციენტებს CGM სისტემები იანვრის თვიდან უნდა მიეღოთ. „მშობლების ორგანიზაციაში ტიპი 1 დიაბეტისთვის“ აცხადებენ,

რომ არათუ აპარატები არ მიუღიათ, კითხვაზე თუ როდის და როგორ მოხდება ბენეფიციარების CGM სისტემებით უზრუნველყოფა, რეალური და კონკრეტული პასუხი ჯანდაცვის სამინისტროს არ აქვს.

„ორგანიზაციას არა ერთხელ მიგვიმართავს ჯანდაცვის სამინისტროსთვის თხოვნით, ტიპი 1 დიაბეტის პედიატრიულ პოპულაციაში არსებული პრობლემების მოსაგვარებლად, მომხდარიყო მათთან ჩვენი შეხვედრა და ერთად გაგვევლო „დიაბეტის სახელმწიფო პროგრამა“, როგორც ამ პროგრამის ბენეფიციარებს, გაეგოთ ჩვენი აზრი.

პროგრამა, რომელიც არ არის მორგებული ბენეფიციარზე, უნდა იყოს გადახედილი!

პროგრამა უნდა მოერგოს ბენეფიციარს და არა პროგრამის შემსრულებელს!

არსებობს რიგი საკითხები, რომლის გადახედვაც უნდა მოხდეს და მხოლოდ მენეჯმენტური პრობლემების ხარჯზე პროგრამა ბენეფიციარის საუკეთესო ინტერესს გაატარებს. ანუ აქ არ არის საუბარი დამატებით თანხებზე , ის თანხები, რასაც პროგრამა ითვალისწინებს, შეიძლება სწორად მიზნობრივად ისე გადანაწილდეს, რომ ბენეფიციარის ინტერესიდან გამოვიდეს,“- აცხადებენ ორგანიზაციაში.

მათივე განცხადებით, 1300 ბავშვის ხმა ალბათ არ არის ისეთი ხმამაღალი, რომ ისმოდეს, „ამიტომ მშობლებმა გადაწყვიტეს ადრესატებს მიუახლოვდნენ და კარებზე დაუკაკუნონ.“

„მშობლების ორგანიზაცია ტიპი 1 დიაბეტისთვის“იზიარებს მშობლების მოთხოვნას და შეუერთდება აღნიშნულ აქციას, რომლის მოთხოვნებია გარდა სიჯიემ სისტემებისა, არის:

1. სერტიფიცირებული ექიმი ენდოკრინოლოგის რეცეპტს დამტკიცება არ სჭირდება.

2. ინსულინი პაციენტზე გაიცეს რეცეპტით , საქართველოს ნებისმიერ აფთიაქში.

3. ინსულინი გაიცეს არა ცალობით, არამედ შეფუთვით, დაუზიანებლად მთლიანი ყუთით.

4. დიაბეტის სახელმწიფო პროგრამა მთელს საქართველოზე ვრცელდება, მაშასადამე საქართველოს ნებისმიერ ქალაქში და კლინიკაში უნდა შეეძლოს პაციენტს მომსახურეობის მიღება.

5.მშობელი თანხას არ უნდა იხდიდეს მისი შვილის ჯანმრთელობის მდგომარეობის შესახებ ცნობაში (50-70ლარი) ე.წ “ფორმა ასი” , რა სახის ცვლილებაც არ უნდა იქნეს მასში შეტანილი.

6. და რაც მთავრაია დღეს 21-ე საუკუნეში , 2022 წელს დიაბეტს ტექნოლოგიები „მართავენ „“ – აცხადებენ ორგანიზაციაში.