Jandacva.ge
ჯანდაცვის სამინისტროს ფარმაცევტული საქმიანობის დეპარტამენტის უფროსმა, დავით მაჭარაშვილმა გადაცემა 2030-ში სტუმრობისას განაცხადა, რომ მთავრობის დადგენილებით, ფარმაცევტული პროდუქტის ლაბორატორიული კონტროლი ბაზარზე შემოტანამდე ხდება.
მაგალითად, გასულ წელს, წარმოდგენილი 30 მედიკამენტიდან, 9 არ დაიშვა. ფარმაციის სფეროში ძირეული ცვლილებები მზადდება. მომზადებულია ვრცელი საკანონმდებლო პაკეტი. დაინერგება კარგი საწარმოო, სადისტრიბუციო და ლაბორატორიული პრაქტიკა, რაც ხარისხის ერთ-ერთი გარანტი იქნება.
მან ასევე აღნიშნა, რომ საქართველოს ბაზარი ყველა კომპანიისთვის ღიაა. დარეგისტრირებულია 5000-ზე მეტი დაწესებულება. მათ შორის – 1300 საბითუმო დისტრიბუტორი.
„სახელმწიფოს მხრიდან ლობირებაზე საუბარი, ზედმეტია. კონკურენციაში სახელმწიფო არანაირად არ ერევა. ბაზარზე თუ ახალი ფარმაცევტული კომპანია შემოვა, მეტი კონკურენცია იქნება, რაც ფასწარმოქმნაზე აისახება და მედიკამენტები გაიაფდება.” – განაცხადა მაჭარაშვილმა.
ფარმაცევტული საქმიანობის დეპარტამენტის უფროსმა ასევე ისაუბრა ფარმაცევტულ ბაზარზე ახლად გამოჩენილ კომპანია „ჰუმანითი ჯორჯიას“ შესახებ. როგორც დავით მაჭარაშვილმა აღნიშნა, “ჰუმანითი ჯორჯიას” პროდუქტი ჯერ მიმოქცევაში არ არის და შესაბამისად მისი ხარისხის შეფასება ვერანაირად ვერ მოხდებოდა.
“ჰუმანითი ჯორჯიას” პროდუქტი ჯერ მიმოქცევაში არ არის და მისი ხარისხის შეფასება ვერანაირად ვერ მოხდებოდა. ასე რომ, იმაზე საუბარი, თითქოს მის მიერ იმპორტირებული პროდუქტი უხარისხოა, უსაფუძვლოა.
ალბათ, კონკურენციის გაზრდის საფრთხეები არსებობს და არასაფუძვლიანი განცხადებებიც ამიტომ კეთდება. “ჰუმანითი ჯორჯიას” ლიცენზიის მფლობელობის ქვეშ დარეგისტრირებული მწარმოებლების უმრავლესობა საერთაშორისო ჯი-ემ-პი-ს – კარგ საწარმოო პრაქტიკას ფლობს.
რაც იმის გარანტია, რომ მათ მიერ საქართველოს ბაზარზე ხარისხიანი, უსაფრთხო და ეფექტური ფარმაცევტული პროდუქტი მოხვდება.” – განაცხადა მაჭარაშვილმა.
