Jandacva.ge
საქართველოს ჯანდაცვის სამინისტრო მედიკამენტებზე ხელმისაწვდომობის გაზრდის აუცილებლოებაზე საუბრობს, რაც ბაზარზე ჯენერიკების სეგმენტის გაფათოების ხარჯზე უნდა განხორციელდეს.
ამისთვის კი, აუცილებელია მედიკამენტის ხარისხის კონტროლის მწყობრი სისტემის ამუშავება, რაზეც სამინისტროში ინტენსიური მუშაობა უკვე დაწყებულია და რეალური შედეგები ცნობილი მალე გახდება.
თბილისის სახელმწიფო სამედიცინო უნივერსიტეტის ბავშვთა ინფექციური სნეულებების დეპარტამენტის უფროსი, პროფესორი, ბავშვთა ინფექციურ სნეულებათა კლინიკური საავადმყოფოს, სამეცნიერო კონსულტანტი მანანა ხოჭავა ჯენერიკ მედიკამენტების ფარმაცევტულ ბაზარზე შემოსვლის საკითხს გამოეხმაურა:
“ჯენერიკი არის პრეპარატის ისეთი ფორმა, რომელიც თავდაპირველად იქმენება და შემდეგში სხვადასხვა სავაჭრო სახელწოდებით შეიძლება შეგხვდეს სხვადასხვა ფარმაცევტული კომპანიის გამოშვების შემთხვევაში. როგორც წესი, ჯენერიკი ძალიან ეფექტური და უსაფრთხოა, როგორც ბრენდული მედიკამენტები. ამასთანავე, ჯენერიკი შედარებით იაფია. თავად და ჩემი ოჯახი ფართოდ ვიყენებთ და ძალიან კარგი შედეგები გვაქვს.
ჯენერიკების დანიშვნა მთელ მსოფლიოშია მიღებული და ყველანაირად მხარს ვუჭერ იმას, რომ საქართველოშიც ფართოდ გამოიყენებოდეს. ჩვენ ქვეყანაში შექმნილი ეკონომიკური მდგომარეობიდან გამომდინარე, ჯენერიკი მიღებულია, მისი ფასიდან გამომდინარე. მას ასევე ფართოდ იყენებენ ევროპასა თუ ამერიკაში. მართალია, ჯენერიკის ფასი დაბალია, თუმცა მისი ხარისხი და ეფექტურობა აბსოლუტურად შეესაბამება სტანდარტებს.“
ექიმი პრეპარატის წარმოების სტანდარტების დაცვის აუცილებლობაზე საუბრობს და მიაჩნია, რომ სტანდარტი უნდა იყოს ერთი და იგივე, როგორც ამერიკისთვის, ასევე ინდოეთისთვის, საქართველოსთვის და ნებისმიერი სხვა ქვეყნისათვის: „აუცილებელია მედიკამენტის შემოტანამდე დადგინდეს, რამდენად დაცულია სტანდარტი და მიღებული აქვს თუ არა პრეპარატს საერთაშორისო გამოყენების სერტიფიკატი.“
