საქართველოში ფაგების ახალი საწარმო გაიხსნა

საქართველოში ფაგის პრეპარატების პირველი ინდუსტრიული მასშტაბის მწარმოებელი ქარხანა გაიხსნა, რომელიც სტერილური (ასეპტიკური) წარმოების გაიდლაინებს აკმაყოფილებს.

ინფორმაციას ეკონომიკის სამინისტრო ავრცელებს.

უწყების ცნობით, გახსნის ღონისძიებას მინისტრის ლევან დავითაშვილის გარდა ესწრებოდნენ მინისტრის მოადგილე ირაკლი ნადარეიშვილი, ევროკავშირის ელჩი საქართველოში პაველ ჰერჩინსკი, EBRD-ის რეგიონული დირექტორი კავკასიაში კატარინა ბიორლინ ჰანსენი, FAO-ს პროექტების კოორდინატორი საქართველოში ხავიერ სანზ ალვარესი, სააგენტოს „აწარმოე საქართველოში“ დირექტორი მიხეილ ხიდურელი და ინოვაციებისა და ტექნოლოგიების სააგენტოს ხელმძღვანელი ავთანდილ კასრაძე.

„ისტორიული საწარმოს მოდერნიზაციისა და გადაიარაღების პროცესი ცოტა ხნის წინ დასრულდა. კომპანიამ, ეკონომიკისა და მდგრადი განვითარების სამინისტროს სააგენტოს „აწარმოე საქართველოში“ და ინოვაციებისა და ტექნოლოგიების სააგენტოს მხარდაჭერით, ასევე ევროკავშირის, EBRD-ისა და FAO-ს ხელშეწყობით, 17,5 მილიონი ლარის საინვესტიციო პროექტი განახორციელა. შედეგად, „ბიოქიმფარმმა“ საწარმო ევროკავშირის GMP (კარგი საწარმოო პრაქტიკის) გაიდლაინების შესაბამისად აღჭურვა, რაც ევროკავშირში მიღებული სტანდარტია,“ – ნათქვამია ინფორმაციაში.

ლევან დავითაშვილის განცხადებით, ციფრული ტექნოლოგიების მხარდაჭერასთან ერთად, სახელმწიფოსთვის ძალიან მნიშვნელოვანია ბიოტექნოლოგიების მხარდაჭერა.

„ჩვენი სამინისტროს ინოვაციებისა და ტექნოლოგიების სააგენტო, ასევე „აწარმოე საქართველოში“ მუდმივად ახორციელებენ მსგავსი კომპანიების ინიციატივების იდენტიფიცირებას და მხარდაჭერას. მოხარულები ვართ, რომ საწარმო წარმატებით ფუნქციონირებს და აგრძელებს იმ დიდ ტრადიციებს, რომელიც ქვეყანას ბაქტერიოფაგების წარმოების კუთხით გააჩნია. ამ კუთხით, როგორც იცით, საქართველო ერთ-ერთი პირველი ქვეყანა იყო გასული საუკუნის 30-იანი წლებიდან. ამიტომ მისასალმებელია, რომ ის ტრადიციები, რომელიც ქვეყანაში არსებობდა, შენარჩუნებულია. მნიშვნელოვანია, რომ საწარმოში შექმნილი პროდუქტი არის საექსპორტო და საქართველო ტექნოლოგიების რუკაზე, მათ შორის ბიოტექნოლოგიების რუკაზე, ამ საწარმოს მეშვეობით ამაყად იქნება წარმოდგენილი მომავალში. სახელმწიფო კი კვლავაც გააგრძელებს მსგავსი ტექნოლოგიური საწარმოების, ტექნოლოგიური პროექტებისა და ინიციატივების მხარდაჭერას“, – აღნიშნა ლევან დავითაშვილმა.