თამარ გაბუნია: არის საწარმოები, რომლებსაც დადგენილ ვადებში ჯიემპი სტანდარტის მიღწევა გაუჭირდებათ

არის გარკვეული საწარმოები, რომელთა ინფრასტრუქტურული მდგომარეობა სერიოზულ ინვესტიციას მოითხოვს და დადგენილ ვადებში ჯიემპი სტანდარტის მიღწევა ცალსახად გაუჭირდებათ. ამის შესახებ ჯანდაცვის მინისტრის მოადგილემ თამარ გაბუნიამ, „ჯი ემ პი“ სტანდარტის დანერგვის პროცესის მიმდინარეობის შეფასებისას განცხადა.

მისი თქმით, თუ გვინდა, ხარისხიან მედიკამენტებზე ხელმისაწვდომობის მიზანს მივაღწიოთ, აუცილებელი წინაპირობაა, რომ დაინერგოს ადგილობრივი ჯიემპი სტანდარტი  და ის მოთხოვნები, რომლებიც ჯიემპი სტანდარტთან მიმართებაში არსებობს როგორც იმპორტირებულ, ასევე ადგილობრივ პროდუქტებზე. მინისტრის მოადგილის თქმით, დიდი დრო გავიდა და ბევრჯერ გადავადდა ჯიემპი სტანდარის ვალდებულებების ამოქმედება, ამიტომ კიდევ ერთი გადავადება არ მოხდება.

„საწარმოები მზად არიან და მუშაობენ ჯიემპი სტანდარტის დასაკმაყოფილებლად.  რეგულირების სააგენტომ უკვე გასცა რამდენიმე სერტიფიკატი, თუმცა არის გარკვეული საწარმოები, რომელთა ინფრასტრუქტურული მდგომრეობა სერიოზულ ინვესტიციას მოითხოვს და დადგენილ ვადებში ჯიემპი სტანდარტის მიღწევა ცალსახად გაუჭირდებათ. თუმცა აქ გამოსავალი არის საინვესტიციო პროექტები და გარკვეული გეგმა, რომელიც მათ იციან რომ უნდა მოამზადონ, თუკი სამომავლოდ ფიქრობენ დარჩნენ ფარმაცევტულ ბაზარზე. იმდენად მნიშვნელოვანია მოსახლეობის ჯანმრთელობისთვის ჯიემპი სტანდარტის ამოქმედება, რომ ნებისმიერი რისკი და ბარიერი, რომელიც ხელს შეუშლის მის ამოქმედებას – გადავადება და მითუმეტეს უპირობოდ ამოქმედება – არ არის გამოსავალი. ჯანდაცვის სამინისტრო და პარტნიორები ცალსახად ფიქრობენ, რომ ჯიემპის ამოქმედება დროულად მოხდეს,“ – განაცხადა გაბუნიამ.

ფარმაცევტული საწარმოებისთვის ჯიემპი სტანდარტის დაკმაყოფილება სავალდებულო 2022 წლის 1 იანვრიდან გახდა. თუმცა პროცესი ეტაპობრივია და GMP-ის სტანდარტზე გადასვლა იმის მიხედვით მოხდება, თუ რომელ თვეში აქვს აღებული ბიზნესსუბიექტს საქმიანობის ნებართვა.

კერძოდ, 2022 წლის 1 იანვრამდე გაცემული ფარმაცევტული წარმოების ნებართვის მქონე იურიდიულ პირებს, რომელთა მიმართაც ნებართვა გაიცა იანვარში, თებერვალში, მარტში, აპრილში ან მაისში (ნებართვის გაცემის წლის მიუხედავად), GMP-ის სტანდარტთან შესაბამისობის სერტიფიკატის გარეშე  საქართველოს ბაზრისთვის განკუთვნილი ფარმაცევტული პროდუქტის წარმოება ეზღუდებათ 2022 წლის 30 ივნისიდან, ხოლო დანარჩენ თვეებში გაცემული ნებართვების შეზღუდვის ვადად განისაზღვრება იმ თვის ბოლო რიცხვი, რომელ თვეშიც განხორციელდა ნებართვის გაცემა.

იმ შემთხვევაში, თუ ადგილობრივად წარმოებული ფარმაცევტული პროდუქტი განკუთვნილია მხოლოდ ექსპორტისთვის, ასეთი ტიპის ფარმაცევტული წარმოება 2025 წლის 1 იანვრამდე თავისუფალია საქართველოს ნაციონალური GMP-ის (კარგი საწარმოო პრაქტიკის) სტანდარტის ფლობის ვალდებულებისგან.

იგივე პრინციპით ამოქმედდა GDP-ის (კარგი სადისტრიბუციო პრაქტიკა) სტანდარტები.

GMP– სტანდარტი – ესაა სტანდარტი, რომელიც ითვალისწინებს მაღალი ხარისხის შენობა-ნაგებობების, მიკრობიოლოგიური ლაბორატორიების, წყლის და ჰაერის ვენტილაციის სისტემის დანერგვას და სხვა მკაცრი მოთხოვნების დაკმაყოფილებას.

ჯანდაცვის სამინისტროში აცხადებენ, რომ ყოველივე ეს მომხმარებლისთვის ნიშნავს გარანტირებული ხარისხის და უსაფრთხო პროდუქციის მიღებას. ამ სტანდარტების დაუკმაყოფილებლობის შემთხვევაში ფარმაცევტული პროდუქცია არც ბაზარზე და არც ექსპორტზე არ დაიშვება.

ამ ეტაპზე GMP-ს მხოლოდ „ავერსი რაციონალი“ ფლობს, GDP-ს  „გლობალფარმა“  და „საფლაი ჯეო “.